Skyline Terrace Town Homes & Lofts

يقع Skyline Terrace في Hill District في مدينة Pittsburgh, Pennsylvania. هالحي كان حي عشوائي و منتشرة فيه الجرائم بكثرة الى سنة 2010، في هالسنة تم تقسيم المنطقة و اعادة تخطيطها و بنائها من جديد بدعم من الحكومة. أغلب سكان الحي من الAfrican American اللي يعتبروا من فئة Section 8. و Section 8 هما العوائل ذوي الدخل المحدود و كتير منهم ما كملوا تعليمهم. مجتمع الAfrican American اجتماعيين بطبعهم و دائما بتلاقي الجيران يعرفوا بعض و بيقضوا أغلب وقتهم برا لو كان الجو حلو و أحيانا عيالهم برا بيلعبوا لحالهم من غير اشراف أهلهم. بالإضافة أنه سكان الحي ما لهم اهتمام بتربية الكلاب فالسكن ما في كلاب أبدا. و من الأشياء المنتشرة في هالحي هيا الحشيش في بعض السكان يحششوا و بتشمي ريحة الحشيش في ممرات العمارة و المصعد و لكن شخصيا ما قد اتأذيت منهم. فلو ما تفضلي هالمجتمع و هالبيئة لا تحطي هالسكن من خياراتك و لا تسكني في هالمنطقة نهائيا.

السكن يتكون من شقق و بيوت. العمارة اللي هيا (Lofts) موجودة في منطقة phase 1 و فيها شقق بـ(غرفة و حمام) أو (غرفتين و حمامين)، أما البيوت اللي هيا (Town Homes) موجودة في ثلاث مناطق phase 1 و phase 2 و phase 3 و فيها بيوت بـ (غرفة و حمام) أو (غرفتين و حمام و نص) أو (ثلاثة غرف و حمام و نص) أو (ثلاثة غرف و حمامين و نص) -النص حمام هو حمام من غيربانيو-.

phase 1 هيا أفضل منطقة من ناحية الهدوء و الناس اللي ساكنين فيها وبعدها phase 2. ابعدي تماما عن phase 3 و لا تفكري تسكنيها حتى لو ما كان فيه خيار إلا فيها لأنها منطقة عشوائية و دائما تصير فيها مشاكل، بالإضافة أنه في عائلتين دخلت بيتهم رصاصة عشوائية. السكن فيه سيارات سيكيوريتي خاصة تدور في السكن حول البيوت بالإضافة أنه العمارة فيها حارس/ة أمن 24 ساعة و الأبواب مأمنة بحيث أنه الدخول للعمارة بمفتاح خاص.

السكن يوفر لك الغسالة و النشافة و غسالة مواعين و ثلاجة و مايكرويف و بالإضافة أنه فواتير Water, Sewer مشمولة مع الإيجار، يبقى عليكي تتواصلي مع شركة الكهرباء و الغاز عشان يوصلوا لك الخدمة و تدفعي فواتيرها شهريا. بالنسبة ل Trash, Garbage and Recycling Services حسب علمي ما عليها رسوم، بالنسبة لسكان العمارة في لهم garbage chutes في كل دور أما بالنسبة للبيوت فالسياة تمر يوم واحد في الأسبوع اللي هوا يوم الثلاثاء. مواقف السيارة مشمولة مع الإيجار و ما عليها رسوم شهرية، العمارة لها مواقف خاصة مقفلة ببوابة لسكان العمارة فقط. أما البيوت بعض البيوت لها مواقف خاصة فيها و لكن بعضها مواقفها هيا المواقف العامة تبع الشارع، و في عوائل من اللي سكنوا في البيوت اللي مواقفها على الشارع سياراتهم انصدمت و بعضهم عيال جيرانهم خدشوا سيارتهم. بالإضافة أنه سكان العمارة لهم مرافق عامة lounge room و business room و gym النادي بسيط جدا يمكن مافيه غير ثلاثة أجهزة و لكن السكن عندهم قانون أنه هالمرافق خاصة بسكان العمارة فقط و ما تفتح إلا من 10 الصباح إلى 10 المساء. أيضا فيه playground للأطفال في منطقة phase 1 و في وحدة تانية في منطقة phase 2.

السكن كبير جدا و في أكثر من ٤٠٠ بيت و وحدة سكنية.  فغالبا أعمال الصيانة تتأخر و يماطلوكي لازم دائما و يوميا تتابعي معهم أول بأول بالعربي تكوني زنانة. و وحدة من الأشياء اللي ما يعتبروها ضروري هيا لو خرب شيء في الحمام و بيتك بحمامين أو حمام و نص ما يعتبروا هالشيء ضروري و ممكن يطولوا أكتر من شهر. فلو خرب أي شي في الحمام ارفعي بلاغ أنه الحمامين خربانة مو واحد غشان العامل يجي بسرعة. و كمان أفضل طريقة تخليهم يجوكي بسرعة هيا لمن تخلي الشيء عشان الأطفال -مثلا خرب الفرن قوليلهم خرب الفرن متى حتجوا تصلحوه بأطبخ أكل لأطفالي أو لو خربة الدفاية اتصلي و قوليلهم أطفالي بردانين تعالو صلحوا الدفاية و هكذا-. العمال عددهم جدا قليل بالنسبة لعدد الشقق فلمن ترفعي بلاغ ارفعيه طوارئ و حاولي تضخيم المشكلة عشان يجي العامل بسرعة و لمن يجي خليه يصلح كل شي حتى المشاكل البسيطة زي فقل الباب و غيرها.

السكن يبعد عن جامعة بيتسبرغ 7 دقايق و يبعد عن جامعة دوكين 5 دقايق بالسيارة. أما بالنسبة للمواصلات العامة في باص يوصل لاغلب المناطق في السكن و يوصل لين باب العمارة رقمه 81 يجي كل ثلث ساعة في أيام الدوام و يوم السبت و الأحد يجي كل ساعة. باص 81 يوصل لجامعة Pitt و Carlow و ياخد تقريبا 20 دقيقة و الباص 81 اللي بالإتجاه المعاكس ياخدك للداون تاون. لو تبغي تروحي دوكين لازم تنزلي لين تحت مشي حق 7 دقايق و بعدين تاخدي واحد من باصات ال60s او ال70s و ياخد تقريبا 7 دقايق.

ادارة السكن مسؤولة عن قص الزرع في الصيف و جرف الثلج في الشتاء،و لكن للأسف ما يجرفوا الثلج قبل الساعة 10 الصباح فلو عندك محاضرات الصباح بدري و حتروحي الجامعة بسيارتك حيكون خطير لأنو السكن موقعه فوق تلة (hill) و السيارة مع الثلج تنزلق و الوضع يصير خطير. و لكن بشكل عام بتسبرغ مدينة ما ينزل فيها ثلج كتير.

لو كان عندك أطفال في عمر مدارس و حابة تسجليهم في المدارس الحكومية فهالسكن مو خيار مناسب لك لأنه تقييم المدارس تبع هالحي جدا جدا سيئة. إلا لو حتسجلي أطفالك في مدرسة خاصة زي المدرسة الإسلامية أو غيرها. و خيار تاني ممكن تحطيه في بالك لو سكنتي في هالحي أنه تسجلي أطفالك في Magnet school لأنو مو شرط أنها تكون من مدارس الحي لكن يكون في بالك أنه هالمدارس لها شروط للتسجيل فيها بعضها يعملوا اختبار للطالب و في حال نجح في هالإختبار يقبلوه و أحيانا تكون بالقرعة على حسب نظام المدرسة -Magnet school هي مدارس حكومية و لكن عندهم مواد و منهج خاص بالإضافة للمنهج اللي يدرس في كل المدراس مثلا تكون عندها برنامج للغة الأسبانية أو منهج رياضيات مكثف أو غيرها-.

أقرب بقالة أو سوبرماركت للسكن هو Family Dollar يبعد دقيقتين بالسيارة غير كدا في ALDI و Giant Eagle في southside works و يبعدوا بالسيارة 5 دقائق.

بتسبرغ مدينة قديمة جدا و بيوتها قديمة برضو فيعتبر هالسكن بناءه و تشطيبه جديد من جوا مقارنة بالبيوت اللي بنفس السعر. السكن ماله موقع خاص فيه و لكن لهم صفحة على موقع apartments و حاطين فيها صور للشقق مع إيجار كل وحدة بالإضافة إلى معلومات التواصل معهم.

من إيجابيات السكن أنه أنتي ملزمة بعقد لمدة 12 شهر فقط و بمجرد ما تنتهي هالسنة يبدأ يصير أيجار شهر بشهر لأي مدة أنتي حابتها، و في حال حابة تغادري السكن لازم تعطي الإدارة خبر قبل ب 30 يوم.

من عيوب هالسكن أنه الإدارات تتغير كتير فحالولي أنه كل تعاملاتك معهم تكون عن طريق الإيميلات بحيث يكون عندك إثبات لو رفضت الإدارة الجديدة شيء كنتي متفقة عليه من قبل و هالطريقة أستخدميها مع كل السكنات مو بس هالسكن لأنو الإيميل يعتبر دليل إثبات لو لا سمح الله صار أي شيء مستقبلا. و أيضا السكن بشكل كبير يعتمد على الجيران اللي جنبك فلو ربي سخر لك جيران طيبين و كويسيين حتكون تجربتك فيه جميلة.

هذي تجربتي الشخصية في هالسكن بعد سنتين و ثمانية أشهر Jan 2018 - Aug 2020، مع العلم إنه أعتبر تجربتي فيه جميلة و ما ندمت على خياري. و لكن في آخر خمس أشهر أو من بدأت كورونا و ادارة السكن أخدين إجازة و صعب جدا التواصل و التعامل معهم لمن تتصلي ما أحد بيرد لأنو مافي أحد في المكتب بالأضافة أنه عمال الصيانة ما يجوا إلا للضرورة القصوى جدا بعد ما ترفعي طلب عن طريق رقم الطوارئ. طريقة التواصل الوحيدة هيا عن طريق الإيميلات. و أيضا من بعد ما بدأت فترة الحجر تبع كورونا ما صار فيه اهتمام بنظافة العمارة يعني صاروا ينظفوها مرة بالشهر عكس قبل كانوا يوميا كل صباح ممرات العمارة كلها تتنظف و تتعطر.

و أخيرا هالمدونة كتبت لذكر سلبيات و إيجابيات السكن لو كان من ضمن خياراتك و حابة تعرفي عنه أكتر و ليس للترويج له في الأخير انتي شوفي ظروفك و احتياجاتك و قرري. بشكل عام مهمة البحث عن السكن متعبة و شاقة لكن الانسان يبذل أقصى جهد يقدر عليه حتى يعيش في مكان مريح و مناسب.

~ ~ دمتم بود ~ ~